لاہور۔ 9 جولائی (اے پی پی) لاہور، گوجرانولہ اَتے راولپنڈی سودھے پنجاب دے مختلف ضلعیاں اچ شدید مینہ، صوبے دے ڈپٹی کمشنرز کوں الرٹ رہݨ دی ہدایت جاری کر ݙتی ڳئن۔ ڈی جی پی ڈی ایم اے عرفان علی کاٹھیا آکھیا جو ہنگامی صورتحال نال نبڑݨ کیتے متعلقہ محکمے الرٹ رہن، صوبائی کنٹرول روم سودھے سارے ضلعیاں دے ڈسٹرکٹ ایمرجنسی آپریشن سنٹرز کوں وی الرٹ کر ݙتا ڳئے اَتے کنٹرول روم اچ صورتحال دی مانیٹرنگ مسلسل جاری اے۔ ڈی جی عرفان علی کاٹھیا آکھیا جو 1122 اَتے واسا سودھے ڈوجھے ریسکیو ادارے مشینری سودھے عملے کوں الرٹ رکھن اَتے نشیبی علاقیاں توں پاݨی دی نکاسی کوں جلدی توں جلدی ممکن بݨاون۔انہاں آکھیا جو مون سون بارشاں دا اِے سلسلہ 13 جولائی تئیں جاری رہݨ دی پیشنگوئی کیتی ڳئی اے، شہری احتیاط کرن، بجلی دے کھمبیاں، لٹکدیاں تاراں، کچے مکاناں اَتے بوسیدہ عمارتاں توں پرے رہن۔ انہاں آکھیا جو شہری ٻالاں دا خاص خیال رکھن اَتے انہاں کوں نشیبی علاقیاں اچ جمع پاݨی دے نیڑے ہرگز نہ ونڄݨ ݙیون، کہیں وی ایمرجنسی دی صورت اچ شہری پی دی ایم اے دی ہیلپ لائن 1129 تے کال کر سڳدن۔
.jpg)
