اسلام آباد۔22 جولائی(اے پی پی)صدر مملکت آصف علی زرداری کراچی اچ شہری سیلاب روکݨ کیتے جامع منصوبہ تیکھے ٻݨاوݨ دی ہدایت ݙیندے آکھیے جو کراچی اچ شہری سیلاب روکݨ کیتے جامع منصوبہ ݙیوݨا ہوسی، حکومت ِسندھ پائیدار اتے طویل مدتی حکمت عملی اپناوے۔ اے ڳالھ صدر مملکت آصف علی زرداری کراچی کوں شہری سیلاب توں بچاوݨ کیتے اجلاس دی اڳواݨی کریندے آکھی۔ اجلاس اچ وزیراعلیٰ سندھ سید مراد علی شاہ وی شریک ہن۔ انہاں ہدایت کیتی جو کراچی اچ زیرِ زمین سرنگاں نال سیلاب تے قابو پاوݨ دی فزیبلٹی اسٹڈی 3 مہینے اچ مکمل کیتی ونڄے، کراچی اتے ایندے ساحلی علاقیاں کوں صاف ستھرا ٻݨاوݨ اتے ڄڳ دے ٻئے میٹروپولیٹن شہراں دے برابر ڳھن آوݨ دی لوڑھ اے، سرنگاں دے مجوزہ منصوبے دے چنڳے ماحولیاتی اثرات پوسن، حکومت سندھ بین الاقوامی ڈونرز کولو سرنگاں دے مجوزہ منصوبے کیتے ماحولیاتی فنانسنگ دی کوشش کرے، آلودہ پاݨی صاف کرݨ دے نظام نال بلوچستان کوں وی زراعت کیتے پاݨی ملسی اتے ماہی گیری دے شعبے کوں وی فیدہ تھیسی۔ اجلاس اچ صدر مملکت کوں عالمی آبی و سیوریج مینجمنٹ ماہرین جامع بریفنگ ݙتی اتے کراچی اچ شہری سیلاب اتے سیوریج دے چیلنجز نال نمٹݨ کیتے مختلف تجاویز ݙتن۔ اجلاس اچ ایڈجوٹنٹ جنرل لیفٹیننٹ جنرل محمد عاصم ملک، وزیر بلدیات سندھ سعید غنی، میئر کراچی بیرسٹر مرتضیٰ وہاب، سینئر سرکاری افسران، مقامی و بین الاقوامی پاݨی دے انتظام دے ماہرین وی شریک ہن۔
