اسلام آباد۔9ستمبر (اے پی پی) پاکستان اتے قازقستان سٹریٹجک شراکت داری کوں مضبوط بݨاوݨ دے عزم دا اظہار کیتا جئیں دا مقصد ٻہو سارے شعبیاں اچ ݙو پاسہ تعلقات کوں نواں عروج ݙیووݨ اے. وفداں دی سطح تے مذاکرات توں پہلے ڳالھ مہاڑ کریندیں ہوئیں نائب وزیراعظم اتے وزیر خارجہ سینیٹر محمد اسحاق ڈار اتے انہاں دے قازقستان دے ہم منصب مرات نورتیلو متفقہ طور تے تجارت، معیشت اتے ٻئے اہم شعبیاں اچ ݙو طرفہ تعلقات کوں مضبوط بݨاوݨ دے آپݨے عزم دا اعادہ کیتا۔ نائب وزیراعظم سینیٹر محمد اسحاق ڈار آکھیا جو ݙوہیں ملکاں وچال تعلقات کوں ٻیا ودھاوݨ دی گنجائش موجود اے۔ انہاں آکھیا جو پاکستان خطے اتے اس توں ٻاہر خاص کر وسطی ایشیائی ریاستاں اچ امن، استحکام، ترقی اتے خوشحالی دا حامی اے۔ قازقستان دے نال مضبوط شراکت داری دی پاکستان دی خواہش دا اعادہ کریندیں ہوئیں نائب وزیراعظم آکھیا جو ݙوہیں ملک ٻہوں سارے علاقائی اتے بین الاقوامی معاملیاں تے سانجھے خیالات رکھیندن۔ انہاں آکھیا جو او ایں سال نومبر اچ قازقستان دے صدر دے دورہ پاکستان دا منتظر ہن اتے انہاں دے وفداں دی سطح تے تھیوݨ آلی ڳالھ مہاڑ دا ہک اہم مقصد دورے دے تفصیلی پروگرام کوں حتمی شکل ݙیووݨ اے۔ قازقستان دے نائب وزیراعظم اتے وزیر خارجہ مرات نورتیلو ایں موقع تے آکھیا جو انہاں دا ملک پاکستان دے نال تعلقات کوں ودھاوݨ کیتے تیار اے۔ انہاں آکھیا جو اساݙی شراکت داری اتے قابل اعتماد دوستی بئی گہری اتے مضبوط جڑاں رکھیندن۔ اسلام آباد اچ حکومتی عہدیداران اتے کاروباری لوکاں نال آپݨی ڳالھ مہاڑ دا حوالہ ݙیندیں ہوئیں انہاں آکھیا جو فریقین ݙو پاسہ تعلقات کوں ودھاوݨ کیتے آپسی دلچسپی دے متعلقہ معاملیاں تے ڳالھ مہاڑ کیتی۔ قازقستان دے نائب وزیراعظم امید ظاہر کیتی جو قازقستان دے صدر دا دورہ ہک نواں سنگ میل ثابت تھیسی اتے ݙو پاسہ تعلقات کوں ٻیا ودھیسی۔
.jpg)
