ڈھاکہ۔21اگست (اے پی پی) وفاقی وزیرتجارت جام کمال خان ڈھاکا اچ بنگلہ دیش دے مشیر صنعت، عادل الرحمٰن خان نال ملاقات کیتی۔ پریس ریلیز موجب ملاقات اچ ݙو طرفہ صنعتی تعاون، سرمایہ کاری اتے وپار دے ودھارے دے مختلف پہلواں تے تفصیلی ڳالھ مہاڑ کیتی ڳئی۔ پاکستان دے ہائی کمشنر بنگلہ دیش عمران حیدروی ایں موقع تے موجود ہن۔ ملاقات اچ ݙوہیں رہنماواں زور ݙتا جو “پاکستان اتے بنگلہ دیش آپݨیاں صنعتی اتے معاشی صلاحیتاں کوں سانجھے فیدے کیتے استعمال اچ گھن آون۔ ملاقات اچ فوڈ سکیورٹی، فوڈ ویلیو ایڈیشن اتے صنعتی ٹیکنالوجی دے تبادلے کوں اہم شعبیں دے طور تے اُجاگر کیتا ڳئے۔ ݙوہیں ملکاں ماہرین اتے وفداں دے تبادلے دے ذریعے علم اتے تجربات دی سانجھ تے وی اتفاق کیتا۔ وفاقی وزیر تجارت جام کمال خان آکھیا جو “پاکستان، بنگلہ دیش دے صنعتی شعبے اچ تعاون، سانجھے منصوبیں اتے سرمایہ کاری چاہندے۔انہاں آکھیا جو ݙوہیں ملکاں کوں ہک سانجھے وژن دے تحت ایجھا سازگار معاشی ماحول پیدا کرݨا ہوسی جیڑھا صنعتی ترقی اچ مددگار ہووے۔ انہاں بنگلہ دیش دی دوا سازی، ٹیکسٹائل اتے آئی ٹی سیکٹر اچ نمایاں کامیابیاں دی تعریف کیتی۔ بنگلہ دیشی مشیر صنعت آپݨے ملک دی صنعتی ترقی اتے ودھدی لوڑھ تے روشنی پاتی اتے پاکستان دے نال تعاون اچ گھاٹی دلچسپی ݙکھائی ۔ انہاں چمڑے دی صنعت، جہاز سازی، شوگر انڈسٹری، زرعی پراسیسنگ اتے ایس ایم ایز کوں ممکنہ تعاون دے شعبے قرار ݙتا۔
.jpg)
