اسلام آباد۔12جون (اے پی پی) وفاقی وزیرخزانہ تے محصولات سینیٹرمحمداسحاق ڈار آکھیا جو پاکستان اتے چین وچال گھاٹے ، تاریخی اتے ݙو پاسہ تعلقات خوش آئند ہن، اقتصادی، تجارتی اتے مالیاتی شعبیاں اچ ݙوپاسہ تعلقات کوں ٻیا ودھاوݨ دی لوڑھ اے۔ اے ڳالھیں انہاں سنوار کوں پاکستان اچ عوامی جمہوریہ چین دی ناظم الامورپانگ چن ژو نال ملاقات اچ ڳالھ مہاڑ کریندیں ہوئیں آکھی۔ وزیرخزانہ چینی ناظم الامور دا وقفے دے بعد ولا پاکستان اچ ذمہ واریاں سنبھالݨ تے خیر مقدم کیتا اتے انہاں کیتے نیک خواہشات دا اظہار کیتا۔ وزیر خزانہ چینی ناظم الامور کوں 9ویں جائزے دی تکمیل تے آئی ایم ایف نال ڳالھ مہاڑ دی پیش رفت بارے وی ݙسیا۔ انہاں آکھیا جو اوکھے معاشی حالات دے باوجود اڄوکی حکومت ولوں نویں مالی سال دے وفاقی بجٹ اچ مختلف شعبیاں دی ترقی کیتے اقدامات اتے انہاں شعبیاں ولوں مثبت ردعمل بارے وی ݙسیا۔ چین دی ناظم الامور گرمجوشی دے جذبات دا اظہار کیتا اتے ݙوہیں ملکاں وچال دوستانہ تعلقات تے روشنی پاتی۔
